Договор за обработка на лични податоци

ClerkMind ги обработува личните податоци само за да ја обезбеди услугата: чување, организирање, прикажување, пребарување, извоз, испраќање известувања и потсетници и правење резервни копии. Обработката трае додека трае користењето на услугата и рокот за бришење по неговиот крај (точка 12).

• Субјекти: корисниците во канцеларијата, клиентите на канцеларијата, спротивните странки, сведоците и другите лица споменати во предметите и документите.
• Видови податоци: податоци за идентификација и контакт, податоци за предметите и постапките, документи и нивната содржина, белешки и комуникација, евиденција на време, трошоци и фактури, и податоци за корисничките сметки и најавувањата.
• Зависно од предметите на канцеларијата, обработката може да опфаќа и посебни категории на лични податоци (на пример, за здравјето) и податоци за казнени дела и осудувања.

ClerkMind ги обработува податоците само според упатствата на канцеларијата: овој договор, Условите за користење и она што канцеларијата го прави во апликацијата. Исклучок е само обработката што ја бара законот, за која ја известуваме канцеларијата однапред, освен ако законот тоа го забранува. Ако сметаме дека некое упатство е спротивно на законот, веднаш ја известуваме канцеларијата.

Лицата што работат на ClerkMind се обврзани на доверливост, со почитување на адвокатската тајна. Апликацијата нема функција со која нашиот персонал би ги гледал предметите, клиентите или документите на канцеларијата. Административната конзола покажува само име и статус на канцеларијата, нејзините корисници (име, е-пошта, улога, статус и време на последна најава) и бројот на записи.

Технички пристап до серверите имаат само овластени лица, за работа и безбедност на услугата, за резервни копии, за поддршка што канцеларијата ја побарала или кога тоа го бара законот.

ClerkMind ги применува техничките и организациските мерки опишани на страницата Безбедност и локација на податоците, која е прилог на овој договор. Мерките ги одржуваме и подобруваме, без да го намалиме нивото на заштита.

Канцеларијата дава општо овластување за подобработувачите наведени на страницата Подобработувачи. За секој нов или променет подобработувач ги известуваме администраторите на канцеларијата по е-пошта најмалку 30 дена однапред. Канцеларијата може да даде приговор. Ако не најдеме решение, може да го раскине договорот пред промената да стапи на сила.

На секој подобработувач му ги наметнуваме истите обврски за заштита на податоците и одговараме за неговата работа.

Базата на податоци, документите и резервните копии се во Германија (ЕУ). Сообраќајот минува преку мрежата на Cloudflare. Кога податоците се пренесуваат надвор од Северна Македонија и ЕУ, преносот е заштитен со мерките што ги бара законот, како стандардни договорни клаузули.

Апликацијата овозможува исправка, бришење и извоз на податоците, со што канцеларијата може да одговори на барањата на субјектите. Барање што ќе стигне до нас го препраќаме до канцеларијата без да одговориме самите, и помагаме колку што е потребно.

Ѝ помагаме на канцеларијата со информации потребни за процена на влијанието врз заштитата на податоците, за претходна консултација со Агенцијата за заштита на личните податоци и за исполнување на другите нејзини законски обврски.

За нарушување на безбедноста на личните податоци ја известуваме канцеларијата без непотребно одложување, а најдоцна во рок од 48 часа откако ќе дознаеме. Известувањето ги содржи природата на нарушувањето, засегнатите категории и приближниот број субјекти и записи, можните последици и мерките што сме ги презеле или ги предлагаме. Ако некоја информација уште не е позната, ја доставуваме дополнително.

На барање ѝ ги даваме на канцеларијата сите информации потребни да се покаже усогласеноста со овој договор. Канцеларијата или ревизор обврзан на доверливост може да изврши проверка еднаш годишно, со најава од 30 дена, во работно време и без пристап до податоци на други канцеларии, на трошок на канцеларијата. Дополнителна проверка е можна по нарушување на безбедноста или по барање на надлежен орган.

Администраторот може во секое време да ги извезе сите податоци на канцеларијата. По престанокот на услугата податоците се чуваат 90 дена, за евентуален извоз, а потоа автоматски и трајно се бришат од базата и од складиштето на документи. Копиите во резервните копии и претходните верзии на документите исчезнуваат во наредните 30 дена. На барање го потврдуваме бришењето писмено. Исклучок е само она што законот бара да се чува.

За прашањата на заштитата на личните податоци, овој договор има предност пред Условите за користење. За одговорноста важат Условите. Македонската верзија е обврзувачка.